ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 59, 23.04.2019/

Maserati,  Грециядәге йорт һәм бер мунча: түрәләр акча янчыкларын ачты

 

Халык көннәр җылытканны һәм Май бәйрәмнәрен көткән арада, түрәләрнең былтыр күпме акча эшләве, милке, гаилә әгъзаларының кереме турында мәгълүмат җиткерә башладылар. Медведев Путинны да уздырган. Ә Татарстан парламенты депутат­лары­ның гомуми кереме, алдагы ел белән чагыштырганда, 725 миллион сумга кимегән.

2-6  gossov.tatar.ru

 
Дәүләт Советында узган ел иң күп керем алган депутат билгеле. “ТрансТехСервис” идарә компаниясе” җәмгыяте советы рәисе Вячеслав Зубарев былтыр 435,6 миллион сум акча эшләп тапкан. Хәер, депутатка алдагы елны да тиңнәр юк иде. Вячеслав Зуба­рев­ның хатыны исә былтыр 167 мең сум керем алган. Гаиләнең милкенә бәйле үз­гәреш юк. Аларның җир кишәр­ле­ге һәм өч фатиры бар.


Анастасия Колесова исә гаи­лә кереме буенча барлык хез­мәттәш­ләренең дә борынына чирт­кән. Ире белән икесенә бер­гә алар узган ел 600 миллион сумга якын акча эшләгән. Анастасия Колесо­ваның еллык кереме – 422 миллион сум. Ире – Казан шәһәре Думасы депутаты Николай Ураев исә гаилә казнасын 171 миллион сумга баеткан булып чыга. Керемнәре генә түгел, милекләре дә тел шартлатырлык: Ураевның, мәсәлән, өч җир кишәрлеге, өч торак йорты, биш фатиры, гаражы, машина кую урыны, ике мотоциклы, “ЗИЛ”, “ГАЗ”, “УАЗ” машиналары һәм Maserati автомобиле бар. Татарстанда мондый машиналар бармак белән генә санарлык.


Өченче урында – “Татпроф” җәмгыяте советы рәисе Сергей Рачков. 2017 елда ул 4,7 миллион сум акча эшләсә, былтыр кереме 142 миллион сум тәшкил иткән. Депутатның Грециядә йорты бар. Былтыр ул ике җир ки­шәр­леге дә алып җибәргән. Тагын бер яңалык: Сергей Рачковның хатыны барлыкка килгән. Моңа кадәр ул ике малай тәрбияләүче әти буларак билгеле иде. Узган елгы декларация кампаниясе нәтиҗәләре буенча “алтын” алган депутат Альберт Фәхретд­и­нов быел унтугызынчы баскычка төшкән. “Кулон” оешмасы генераль директорының кереме 17 тапкыр диярлек кимегән. Узган ел ул нибары 36 миллион сум акча эшләгән. Хатыны да алдагы ел белән чагыштырганда, 36 тапкыр кимрәк керем алып, гаилә казнасын 408 мең сумга баеткан.


Былтыр “Бәхетле” кибетләре хуҗасы Мөслимә Латыйпованың кереме 38,8 миллион сумга җиткән. Депутат бик тыйнак яши: аның 77,5 квадрат метрлы бер йорты һәм 61,8 квадрат метрлы бер фатиры бар. “Татнефть” генераль директоры Наил Мәганов­ның кереме 113 миллион сум тәшкил иткән. Алдагы елны ул 139 миллион сум акча эшләгән булган. Наил Мәгановның бер машинасы да юк. “Газпром трансгаз Казан” җәмгыяте генераль директоры Рәфкать Кантюков алдагы елны – 30 миллион, былтыр 28,5 миллион сум акча эшләгән.


Татарстан Дәүләт Советы Рәисе Фәрит Мөхәммәтшин 2018 елда 20,6 миллион сум керем алган. Алдагы ел белән чагыштырганда, 3,1 миллион сумга күбрәк. Луиза ханым гаилә казнасын 10 миллион сумга баеткан. Дәүләт Советы Рәисе урынбасары Юрий Камалтынов алдагы ел дәрә­җәсендә акча эшләгән. Былтыр ул 4,9 миллион сум керем алган. Ә менә хатыны 12,2 миллион сум акча эшләп тапкан. 2017 елда аның кереме нибары 176 мең сум тәшкил иткән булган. Тагын бер урынбасар Римма Ратникова узган ел 5,5 миллион сум акча эшләгән. Ире гаилә казнасына 209 мең сум акча өстәгән. Татьяна Ларионова гаиләсендә дә бар да тотрыклы: былтыр “Яңарыш” фондының башкарма директоры – 4,3 миллион, ире 256 мең сум акча эшләгән.


“Татфондбанк”ның элеккеге җи­тәкчесе, хәзер “өй сагы”нда уты­ручы Роберт Мусин 1,4 миллион сум керем алган. Хатыны 17 миллион сум акча эшләгән.


Татарстаннан сайланган Россия Дәүләт Думасы депутатлары арасында, керемнәре буенча, беренче өчлектә үзгәреш юк. Алдагы елдагы кебек үк, быел да беренчелек – Айрат Хәйруллинда. Былтыр ул 158,8 миллион сум акча эшләгән. Аның кереме 10 миллион сумга арткан. Бер машинасын да сатып җибәргән. Ирек Богуславский былтыр 16,5 миллион (алдагы ел белән чагыштырганда, 30 миллион сумга диярлек азрак) сум акча эшләсә, Әлфия Когогина 11,4 миллион сум (19 миллион сумга диярлек азрак) керем алган. Депутат ханымның күңеле тыныч. Аның ире – КамАЗ генераль директоры Сергей Когогин узган ел,  40 миллион сумга күбрәк акча эшләп, гаилә казнасын 147,8 миллион сумга баеткан. Мәс­кәү­дәге тагын бер депутатыбыз Фатих Сибагатуллин былтыр 10,7 миллион сум керем алган. Аның милек исем­легендә, 19 җир кишәрлеге, сакчы йорты, ачык һавадагы машина кую урыны, кафе, ике кунакханә, өч ашханә, дүрт минераль ашлама склады, агач эш­кәртү цехы да бар. Ә Татарстаннан депутат Борис Менделевич 85 квадрат метрлы мунча белән шаккатырган. Федерация Советы вәкиле Олег Морозов былтыр 24,5 миллион сум акча эшләгән. Алдагы ел белән чагыштырганда, Татарстаннан сайланган сена­тор­ның кереме 3,5 тапкыр диярлек арткан. Машинасы гына юк.


Россия Президенты Владимир Путин былтыр 8,6 миллион сум акча эшләгән. Аның кереме 10 миллион сумга диярлек киме­гән. Россия Премьер-министры Дмитрий Медведев Илбашын да уздырган. Узган ел ул 9,9 миллион сум акча эшләгән. Ил хөкүмәте җитәкчесе хатыны былтыр бер тиен дә керем алмаган.


Акрынлап төбәк башлыкла­ры­ның  да керемнәре турында мәгъ­лү­мат чыга башлады. Татарстан Президенты Рөстәм Миңне­ха­новның узган ел күпме акча эшләве әлегә билгесез. Кузбасс башлыгы Сергей Цивилев бер ел эчендә 70 миллион сум акча эшләгән әнә. Свердловск өлкәсе­нең Серов шәһәре мэры Василий Сизиковның балигъ булмаган улының кереме дә колакны торгызды. Ул былтыр 409 мең сум акча эшләгән. Дөрес, соңрак түрә моны алимент акчасы дип аң­латкан.

 

2-1

(“Ватаным Татарстан”,   /№ 58, 19.04.2019/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!