ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 41, 22.03.2019/

Укырга беркайчан да соң түгел: өстәмә белем комачауламый


Казанда пенсия яшенә якынлашучыларны яңа һөнәргә укыта башладылар. Белем бирү “Өлкән буын” федераль проекты кысасында алып барыла.  Беренчеләрдән булып, “Метроэлектротранс” оешмасында эшләүчеләр шундый курсларда укый башлады. Бу юлы 30 кешедән торган төркем оешкан.

2-1  
Пенсия яшенә якынлашучы дигәндә, лаеклы ялга чыгарга биш ел калган кешеләр күз уңында тотыла. Быел ул төркемгә 1959 –1963 нче елгы ир-атлар һәм 1964 – 1968 нче елгы хатын-кызлар керә. Татарстан хезмәт, халыкны эш белән тәэмин итү һәм социаль яклау минис­тры Эльмира Зарипова әй­түенчә, әлеге федераль проектта республикадагы 77 оешма катнаша. Пенсия алды яшен­дәгеләр 118 һөнәр буенча белем алачак. Ки­лешү күп оч­ракта әлеге программада катнашырга теләк белдергән оеш­малар белән төзелә һәм аларда нинди һөнәрләргә ихтыяҗ булуы исәпкә алына. Быел исә 2 меңнән артык кеше укыячак. Аларның байтагы эшли, ә курсларда өстәмә белгечлек үзләштерәчәк. Шул ук вакытта социаль яклау бүлек­лә­рендә беркайда эш­ләмәүче яки эшсез калган кеше­ләрдән дә гаризалар кабул ителә. “Хезмәт базарында ихтыяҗ булган белгечлеккә укыткач, аларга да эшкә урнашырга булышабыз”, – ди министр. Хәзергә 1 мең 800 кешедән гариза кергән.


Чаллыдагы “КамАЗ” бер­ләшмәсеннән 370 кеше федераль проект буенча парта арасына утырачак икән. Алар насос җайланмалары машинисты, йөк төяү машинасын йөртүче һәм башка белгеч­лекләр буенча һөнәр үзләш­терәчәк. Казандагы һәм Әл­мәттәге “Водоканал” пред­приятиеләреннән 865 кеше экскаватор машинисты, химик анализ лаборанты кебек белгечлекләргә укый. “Казан” халыкара аэропортында пен­сиягә чыгу яшенә якынлашып килүче 98 кешегә өстәмә белем бирергә ният­лиләр. Карпов исемендәге химия заводыннан 30 эшче котельный операторы һө­нәренә укый. Бу проект тагын шул ягы бе­лән кызыксыну уята: эш­ләмәү­челәргә уку дә­верендә айлык минималь хезмәт хакы күлә­мендә стипендия түләнә. Ул сумма – 11 мең 280 сум.


2024 елга кадәр шушы федераль проект кысасында рес­публикада 12 мең кешене укы­тачаклар. Яңа оешкан курста укучылар арасында 56 яшьлек Фирдан Мөхәммә­дия­ров та бар. Ул Казандагы беренче трам­вай депосында эшли, 33 ел стажы бар. Фирдан абый – һөнәре буенча сле­сарь-агрегатчы. Биш айлык курсны тәмамлагач, хәрә­кәт итү­че состав слесаре таныклыгы алачак. “Өстәмә һөнәр үзләштерүнең зыяны булмас, кирәге чыгуы бар, дип килдем”, – ди Фирдан абый. Аннан хәзер башкара торган хезмәте хакында белештек. Эшнең агы-карасы юк дисә­ләр дә, бөтен кеше дә слесарь булырга атлыгып тормый. “Эшне алыштыру ту­рында уйлап караганым да булмады. Хәзер инде ия­лән­гән, хезмәт хакы дә әй­бәт: 35–40 мең сум”, – ди ул.


Бу тотрыксыз заманда кеше, олыгая барган саен, пен­сиягә чыкканчы эшсез калмасам ярар иде, дип борчыла. Фирдан абыйны монысы да куркытмый, чөнки тәҗ­ри­бәле слесарьлар һәр­кайда кирәк. Трамвай депосында эш иртәнге җи­дедә башлана. Салгаларга яраткан, вазифасын эленке-са­лынкы башкарган кешеләрне монда тотмыйлар. “Хезмәт урынында эчү түгел, тәмәке тарткан кешене дә күрмәссез, хәзер халык тәртипле”, – ди Фирдан Мөхәммәдияров. Курсларда уку эш көннәрендә кичке якта – сәгать алтыдан ту­гызга кадәр оештырыла. “Метро­­электротранс” оешмасы эш­челәре укуны июль уртасында тәмамлый.

(“Ватаным Татарстан”,   /№ 31, 02.03.2019/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!