ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 88, 22.06.2019/

“Кая барып бәрелергә белмим”

 

Әтнә районының Яңа Шимбәр авылында гомер итүче 78 яшьлек Флера апа Фәтхуллина редакциягә үзе шалтыратты. “Сезнең газета минем кебекләргә булыша икән, дип ишеттем. Язып чыксагыз иде, бәлки, берәр изге күңелле кеше табылыр?” – диде ул.

17-2
Күрмәгәнем калмады

Флера апаны бәхетсезлек кечкенә чагыннан сагалап йөри. Әтисе сугышка китеп, өч көн узгач, дөньяга килә ул.

 
– Җитлекмичә, вакытыннан алда ашыгып туган бала мин. Әтинең кайдалыгын да белмичә үстем. Әни башка кешегә кияүгә чыкты. Шулай итеп, миңа чит кешегә әти дип әйтергә туры килде. Әмма ул әйбәт булды. Әле дә әтиле чакларны юксынып куям. Какмады, сукмады, ятим дип кимсетмәде. Үзенеке итеп яратты, – дип сөйли Флера апа.


Башта алар гаиләләре белән Әтнәдә яши. Моннан 60 ел элек ул Яңа Шимбәр авылына эшкә килә. Икътисадчы булып эшли, аннан соң кибеткә урнаша. Бүген үзенең авырып ятуын да авыр хезмәттән күрә. Салкын кибеттә эшләп, авыру эләктердем, дип искә ала ул.


Шушы авыл егетенә кияүгә чыгып, бер-бер артлы балалар таба. Тик бер малаеның гомере булмый. Фәрит 30 яшендә кинәт кенә үлеп китә. Күп тә үтми, артыннан йөрәк чире белән килене Сәлимә якты дөньядан китеп бара. Аларның биш яшьлек малайлары кала.


– Шул баланы алып кайтып үстердем. Төрле чак булды инде. Иремнең әнисе дә урын өстендә параличланып ятты. Аны да, кадерләп карап, соңгы юлга озаттым. Әти белән әнине дә үземә тәрбияләргә туры килде. Ирсез калганга да шактый еллар инде. Бәла бер килсә килә инде ул. Оныгым да ике тапкыр бер урында юл фаҗигасенә эләкте. Беренче тапкыр авариягә очрагач, бөтен акчабызны җыеп, яңадан машина алган идек. Шаккатмалы хәл: шул җирдә тагын фаҗигагә юлыкты. Үзен аякка бастырыр өчен, бик күп акча кирәк булды.

Бар өметем сездә генә!

Флера апаның күзләре начар күрә икән. Берсенә, Йошкар-Олага барып, операция ясатып кайткан булган. Әмма тернәк­ләнүгә бик күп акча түккән. Ай саен күз өчен генә дә 2 мең сумлык дару ала. Сул аягына да баса алмый. Урынга аумас өчен, аңа укол кадатып торам, ди. Анысының да бәясе кыйммәт – 20 көнгә исәп­ләнгән бер укол 5400 сум тора.


– Икенче күземә операция ясатырга акчам җитми. Казан табибларына да күренгән идем. Бушлай ясатыр өчен, бик озак көтәсе. Әгәр 100 мең сум алып килсәң, иртәгә үк ясыйлар. Тик миндә андый акча юк. Бер пенсия акчасын кая гына җиткерәсе инде аны, – ди ул. – Әгәр чират көтеп торсам, күзем сукыраерга мөм­кин. Шуңа күрә мәрхәмәтле ке­шеләр булышмасмы дип, сезгә мөрәҗәгать иттем. Узган ел бер күземә операция ясату 50 мең сумга төшкән иде. Быел балаларым 20 мең бирде инде. Тагын 15-20 мең сум җыеп булмасмы? Калганын бурычка да алып торыр идем. Күршеләрем ташламый мине. Зинһар өчен, булышсагыз иде.


Флера апа Фәтхуллинага яр­дәм итәргә теләүчеләр 222-09-67 телефоны аша редакциягә шалтырата ала.

 

Игълан тактасы

 
Меңе белән әйләнеп кайтсын!


Ярдәм сорап, “Ватаным Татарстан” газетасына хат язган идем. Алты бала белән берүзе калган күршемә булышуларын үтендем. Шул көннән бирле телефоным тынып тормый. Кемнәр генә шалтыратмады, ярдәм ит­мәде. Шаккатмалы хәл! Һәр кеше­нең – үз тормышы, үз мәшәкате, дип уйлаган идем. Моның кадәр ярдәмне күргәч, җир йөзендә игелекле кешеләр­нең күп икә­ненә инандым.


Казанның Нагорный бис­тәсендә яшәүче Салих исемле кеше ике капчык бәрәңге китерде. Исемен әйтергә теләмәгән ханым, балаларга дип, күп итеп татлы ризыклар калдырып китте. Өс киемнәре, урын-җир әйберләре бирүчеләр дә шактый булды. Кай­берәүләр күршемә акча да биреп киткән. Минем  үтене­чем­не ишеткәнегез өчен мең рәхмәт! Рамазан аенда кылган игелек­ләрегез үзегезгә меңе белән әй­ләнеп кайтсын!

Гөлфия. Казан


Кемгә кирәк?


Хатын-кызларга яраклы 42-46 үлчәмдәге җәйге күлмәкләр, футболкалар бирәм. Кулланышта булган аяк киемнәре дә күп. Шулай ук 3-4 яшьлек кыз бала өчен бик күп кием-салымнар әзерләп куйдым. Кирәк кеше 89872076910 телефоны аша элемтәгә керсен иде.

Зөлфия
***
Ир-атлар өчен 48-50 үл­чәм­дәге җәйге күлмәкләр бирәм. Күбесе бер дә киелмәгән. Шулай ук 9-10 яшьлек малайларга кышкы куртка, калын чалбарлар, киез итек бар. Хәбәрләшү өчен телефоным редакциядә.
Резеда. Лаеш

 
Кемдә бар?

 
Миңа 69 яшь. Пенсиям бик аз. Моннан бер ел элек сезнең газетага үз хәлем турында язгач, яр­дәм итүчеләр табылды. Алар бир­гән киемнәр белән бүгенгә ка­дәр яшәдем. Ул кешеләрнең кай­берләре әле дә онытмый, хә­лемне белеп тора. Миңа әллә ни күп кирәкми. 48 нче үлчәмле күл­мәкләр, 38 үлчәмле аяк киемнәре булса, шул җитә. Телефоным ре­дакциядә.
Сания апагыз

(“Ватаным Татарстан”,   /№ 72, 17.05.2019/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Фотохәбәр

Видеохәбәр