ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 56, 20.04.2018/

Керемнең артыгы булмас

 

Татарстанда уртача хезмәт хакы артачак. Әлегә ул 32 мең сумны тәшкил итә. Хезмәт хакы 2016 ел белән чагыштырганда 5,9 процентка арткан. Быелның май аеннан тагын арту көтелә. Бу хакта кичә Татарстанның Хез­мәт, ха­лык­ны эш белән тәэмин итү һәм социаль яклау министр­лы­гының ки­ңәйтелгән утырышында Татар­станның премьер-ми­нистры Алексей Песошин хәбәр итте.

2-4
 “Татарстан хезмәт хакы күләме буенча Идел буе округында алдынгы урында тора. Без  Пермь краеннан соң  икенче урында торабыз. Россия Президентының “май” указлары нигезендә аерым категория гражданнарның хезмәт хакларын арттыру буенча планлы эш алып барыла. Узган ел хезмәт хакларын арттыру 4 этапта башкарылды. “Май” указларына эләк­мәгән бюджет өлкәсе хезмәт­кәрләренең эш хакына 2017 елның 1 июленнән 1580 сум өстәлде. Быелның гыйнварыннан хезмәт хаклары 4 процентка артты. Татарстан буенча да хезмәт хакын арттыру программасын әзерли­без”, – ди министр. –  Республикада минималь хезмәт хакы 9 489 сумны тәшкил итә. 2018 елның 1 маеннан исә ул – Россиядә үткән елның II кварталына билгеләнгән яшәү минимумы күләмендә, ягъни 11 163 сум булачак”.

Министрлык уртача хез­мәт хаклары күләме минималь хезмәт хакыннан һәм яшәү минимумыннан азрак булган предприятиеләрне дә ачыклаган. 2017 ел нәти­җәләре буенча Казан, Әлмәт, Тукай, Чирмешән районнары “кара” исемлеккә кергән. Шулай ук хезмәт урынына бә­хетсезлек очраклары иң күп теркәлгән шәһәрләр­не дә атап киттеләр. Казанда 44 эшче бәлагә тарыган булса, 14е исә һәлак булган. Чаллыда 28 очракның – 5сендә, Әлмәттә 8 очракның өчесе бәхетсез тәмамланган. Хезмәтне саклау буенча координацион совет районнарга чыгып, хезмәткәрләргә аңлату эш­ләре дә алып барган. Бу эш бушка китмәгән, белгечләр булып кайткан Әтнә, Питрәч районнарында андый бер генә очрак та теркәлмәгән.


Хезмәт хакы арту белән беррәттән, 2018 елда туган беренче балага пособие күләме дә арткан. Бу акчаны теләсә кемгә бирмиләр дә әле. Мәсәлән, гаиләдәге керем һәр кеше башына 13 мең 713 сум чыкмый икән, сабыйга 8 мең 490 сум күләмендә акча түләнәчәк. Мондый пособиегә дәгъва кылучы гаилә дә бар инде. Балтач районында яшәүче сабый быел туган һәм аларның керемнәре дә җитәрлек тү­гел. Шунлыктан алар дәүләт­тән бирелә торган ярдәмгә өмет итә ала. Әлегә яшь гаилә бу акчаны алу өчен гариза язган, ике атнадан исә, тиешле күләмдәге акча килеп тө­шәчәк. Бу пособиене алыр өчен социаль яклау бүлегенә бары тик бер генә тапкыр барып документ тапшырасы. Тиздән балалар бакчасыннан кире кайтарылып бирелә торган компенсация өчен дә  бары тик бер генә бару җитәчәк. Пенсионерларның да эшен киметәләр. Алар ай саен юл акчасын алу өчен чират торудан “котыла”. Әгәр алар үзләренә тиешле акчаны озай­туга ризалык бирә икән, ул автомат рәвештә эшләнәчәк.

(“Ватаным Татарстан”,   /№ 4, 13.01.2018/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Видеохәбәр