ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 56, 20.04.2018/

Әҗере булмый калмас


Беренче бала тугач бирелә торган яңа төр пособиегә документларны республикада иң беренче булып Балтач районы, Сизнер авылында яшәүче Юлия Тарасова тапшырганлыгы турында кичә хәбәр иткән идек инде.

1-1

“Һәр бала үз бәхете, үз ризыгы белән туа” – безнең халыкта шундый әйтем бар. Шулай дисәләр дә, киле­шә­сездер, бүген бала табу, үстерү – шактый кыйммәтле шатлык. Әлеге “шатлык”­лар­­ны санап тормыйм, ул ка­дәресен үзе бала үс­тер­мәгән кеше дә чамаларлык. Шуңа да хөкүмәт тарафыннан бала үстерүчеләргә күр­сәтелгән ярдәмнең һәр­кай­сын сөенеп алырга ки­рәктер. Ни генә дисәң дә, бала үсте­рүчеләргә аның артыгы булмый. Моннан ун еллап элек барлыкка килгән “Ана ка­пи­талы”ның игелеген дә күпләр күрде, әле дә “бетә күрмәсен” дип, срогы арткан саен шөкер итәләр. Дөрес аңлагыз, бәби­не акчага кызыгып алып кайталар дип язарга җыенмыйм, аның алып кайтырга телә­мәгәне үзе кадәр алтын бир­сәң дә алып кайтмый. Икенче, өчен­че балаларын да әлеге акча өчен түгел, нигездә балаларына ип­тәшкә, картлыгына таяныч, өмет дип алып кайталар. Әмма “Ана капиталы” бар­­лыкка килгәннән соң икен­че, өченче балаларын алып кайтучылар артты. Монысы да факт.

 
2018 елны каршылаганда һәм, билгеле инде, алда торган сайлау йогынтысыдыр да: ил башлыгы әни­ләрне һәм булачак әниләр­не сө­ендерә торган ике фәр­манга кул куйды. Бе­рен­че­дән, әле­ге дә баягы “Ана капита­лы”ның гомере 2021 елга кадәр озайтылды. Икенчесе – 2018 елның 1 гыйнварыннан соң беренче баласын тапкан һәм уллыкка алган әниләргә яңа төр пособие түләнә башлый. Дөрес, бу ярдәмгә барлык әниләр дә дәгъва кыла алмый. Аны аз керемле гаи­ләләргә би­рә­чәкләр. Әл­лә ни документлар да ки­рәкми, берничә шарт үтәл­сә, шул җитә. Әти-әнинең паспорты, баланың туу турындагы таныклыгы, гаи­ләнең кереме турында бе­лешмә һәм банкта ачылган шәхси исәп-хисап счеты.


Кемнәрдер әле бу турыда яңарак ишетеп яки җитешә алмый йөрсә, инде республикада бу төр пособиегә документ тапшыручы да бар. Балтач районының Сизнер авылында яшәүче Юлия Тарасова иң өлгер­ләрдән булып чыккан.


– Бер көндә бөтен документларны җыйдылар, икен­­че көнне рәсми­ләш­терделәр дә, – дип сөйли район социаль яклау бүлеге мөдире Алсу Гатиятуллина. – Бу – безнең аша түләнә торган пособие. Монда иң мөһим шарт: гаиләнең җан башына уртача кереме ур­тача яшәү минимумының бер ярым тапкырыннан артык булырга тиеш түгел. Татарстанда бу сумма 13 мең 713 сум килеп чыга. Шушы шарт үтәлсә, балага бер яшь ярым тулганчы ай саен 8490 сум пособие түләнәчәк. Һәм ул – социаль иминият­ләш­терү аша яшь ярымга кадәр бала тәрбияләгән өчен һәр­бер әни ала торган посо­биегә өстәмә. Шулай ук беренче бала тугач бер тапкыр бирелә торган 16 мең сум да түләнә. Тарасовларга кил­­сәк, Юлия тормыш ип­тәше Вячеслав белән авылда, әти-әниләре, әтилә­ре­нең абыйсы, Вячеславның абыйсы, энесе белән бергә, зур гаилә булып яшиләр. 4 гыйнварда кызлары туды, 9ында бала тудыру бүле­геннән өенә кайтты, 11ендә инде әзер документлары бе­лән безгә килделәр... Бу акча яшь гаиләгә бик тә ки­рәкле, күләме дә сизелерлек дип уйлыйм.


– Чыннан да, бик сөен­дек, – ди Юлия, – иң элек коляска алырбыз дип килештек...


– Бездә демографик хәл болай да әйбәт иде, үткән ел районда 370 бала туган, шу­ның 117есе – беренче бала, 358 кеше вафат булган. “Ана капиталы”ннан соң балалар туу 15 – 20 процентка үскән иде, бу ярдәм­нең дә нәти­җәсе булмый калмас, – ди Тарасовларның шатлыгын уртаклашырга, районда 2018 елда иң беренче туган сабыйны котларга килгән район башкарма комитеты җи­тәкчесе Рамил Шакиров.

(“Ватаным Татарстан”,   /№ 4, 13.01.2018/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Видеохәбәр