ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 71, 23.05.2018/

Ялган кәгазьгә көн бетә. Авыру уен эш түгел

 

Узган елның июль аеннан вакытлыча эшкә яраксызлык кәгазен, ягъни хастаханә бюллетенен электрон вариантта тутыра башладылар. Аны кәгазь “больничный”лар кебек кулга бирмиләр, оешмага интернет аша гына озаталар.  Ярты ел эчендә 1662 бюллетень электрон форматта тутырылган.

2-2
tatar-inform.ru

 

Бездә һәр яңалык башлангыч чорда, нигә кирәк инде, дигән шик  астына алына. Россия Социаль иминиятләштерү фондының Татарстан төбәк бүлеге идарә­чесе Рамил Гайзатуллин әй­түенчә, электрон вариант ялган “больничный”ларны кысрыклап чыгара. Фонд хезмәткәр­ләре барлык бюллетеньнәрнең өч ярым процентының ялган булуын фаш итә икән. Әлеге мәгъ­лүматлар хезмәткәрнең эш урынына хәбәр ителә һәм хокук сак­лау органнарына җибәрелә. Җи­тәкче фикеренчә, ялган “боль­ничный” тутырып утыру вакыт әрәм итү генә, файдасыз гамәл ул, идарә хезмәткәрләре аны бик тиз күреп ала.

 

“Боль­ничный”ның тагын бер төрлесе бар икән әле, ягъни дәвалау оешмасында табиб үзенең танышына авырмаган килеш тә бюллетень ачкан очраклар да була. Андый хәлләрне ачыклау авыргарак туры килә икән. Рамил Гайзатуллин бу уңайдан бер мисал китерде: берәү Тайландка ялга китә, барыр алдыннан сәбәпсез эш калдырмау һәм артык акча чыгармау җаен да кайгырта: таныш табибыннан вакытлыча эш­кә яраксызлык кәгазе тутырта. Бу кырын эш ничек ачыкланган, ди­сезме? Социаль иминият фондына ялга китүченең “якын дусты”, күршесе шалтыратып җиткергән. Ә электрон вариантның өстен­легенә килгәндә, кеше турында мәгъ­лүмат базага кертелгәч, табибка аны яңадан җыеп утырырга кирәкми, бу медицина оеш­ма­сының да, бухгалтериянең дә эшен җиңеләйтә икән. Әмма кешенең ике вариантның үзенә кулаен сайлау мөмкинлеге бар.


Социаль иминият фонды хез­мәт урынында зыян күрү­че­ләргә акчалата пособие түләү белән дә шөгыльләнә. Моның өчен зыян күрүченең комиссия тарафыннан тутырылган акт кәгазе булырга тиеш. Кайбер оешмалар  котылгысыз хәл килеп чыкканда, моны йомып калырга тырыша. Нәтиҗәдә имгән­гән кеше шактый гына суммада ак­чадан колак кагарга мөмкин. Шуңа күрә эштә зыян күргән очракта комиссия чакыртып, акт төзетү ягын кайгыртырга кирәк. Шуның буенча социаль түләү билгеләнә. Зыян күрү ниндидер сәбәпләр аркасында “йомылып” калса, яклау эзләп, хезмәт инс­пекциясенә мө­рәҗәгать итәргә кирәк. Производствода килеп чыккан бәхет­сезлек очрагында вафат булган­нарның якыннарына 1 миллион сумга кадәр акчалата ярдәм күр­сәтү каралган.

Физик мөмкинлекләре чикле кешеләрне тернәкләндерү чаралары белән тәэмин итү дә 2016 елдан башлап Социаль ими­ниятләштерү фонды карамагына күчерелде. Ул елны техник чаралар белән тәэмин итүдә өзек­лекләр дә булып алды. Моны акчаның соңарып күчүе белән аңлаттылар. Соңгы елда федераль казнадан бу максатлар өчен акча 100 миллион сумга күбрәк тә бүленгән. Авыру кеше яки аның гаиләсе техник чараларны үзе юнәтсә, ул документларны Иминият фондына тапшырып, акчаны кире кайтара ала. Әйтик, инвалид арбаларын сатып алучылар байтак икән, чөнки хөкүмәт биргәнне ошатмаучылар да юк түгел, аның йә үлчәме туры килми, йә йөртергә уңай­сыз. Узган ел шәхси гозерләрне искә алып, 70 кешегә махсус арбалар сатып алынган.

 
“Тернәкләндерү чарасы канә­гатьләндерми икән, аны башта ук алырга кирәкми. Алган сурәттә, бүтәненә тиз генә өметләнә алмыйсың, аны һәрдаим алмаштырып, яңартып булмый бит инде”, – ди Социаль иминият фон­дының инвалидларны тәэмин итү бүлеге җитәкчесе Марат Сә­гыйров. Колак аппараты белән дә шундый ук хәл. “Аппаратны бирәбез дигәч, барып алдым, өй­гә кайткач киеп карасам, гөжләп тора, берни ишетмим”, – дигән иде Түбән Камада яшәүче бер танышым. Марат Сәгыйров аңла­туынча, алдым дип, документка култамга куйганчы, аппаратны кат-кат тикшереп каравың хәер­ле, чөнки ул дүрт елга бер бирелә һәм аны кире кайтарып булмый.

(“Ватаным Татарстан”,   /№ 3, 12.01.2018/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!