ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 7, 19.01.2019/

Әллә шуңа укыганнар инде...


Олы яшьтәге бер танышым ел азагында Чаллы шәһәрендә урнашкан санаторий-профилакто­рий­да сәламәтлеген ныгытып кайтты. Аңа, инвалид буларак, 18 көнлек юллама биргәннәр иде. Профилакторийга беренче генә баруы түгел, хас­таханәләрдә дә яткалый. Бу юлы санаторийдагы персоналның сабырлыгына шаккаткан.

5-6

tatar-inform.ru

 

“Әйбәт булды, тик канәгатьсезлек белде­рү­­че­ләр һәркайда бар, нәр­сә генә әйтмиләр, вак-төяк­кә дә бәй­ләнәләр. Анда эшләүчеләр нинди генә хәлләргә тарымыйлар, нинди генә сүзләр ишетмиләр. Араларыннан берсе ник ялгыш кына булса да төксе җавап кайтарсын? Юк, дәш­миләр, елмаеп басып торалар. Аларны әллә шуңа укытканнар инде... Элек алай түгел иде бит”, – ди ул.  

  
Танышымның, әллә шу­ңа укытканнар инде, дигән сүзе кызык булып китте. Чыннан да, дөрес сизем­ләгән. Халыкка хезмәт күр­сәтү өл­кәсендә эшләүчеләр  психологик әзер­лекне даими уза. Аларны гел семинарларга җыеп торалар. Социаль хезмәткәр­ләрне генә түгел, табибларны да нәрсәгә генә укытмыйлар хәзер. Белгечлекләрен ка­мил­ләштерү, һөнәри осталыкларын чарлау дисеңме... Зуррак шәһәрләргә, хәтта чит илләргә стажировкага да җибәрәләр. Узган ел психологик тренинглар үткә­рүгә дә шактый вакыт би­релгән. “Дустанә поликлиника – Татарстан стандарты” республика проекты кысаларында Түбән Кама районы үзәк хастаханәсе хезмәткәрләре белән Казаннан килгән белгеч шө­гыльләнгән. 2018 ел­ның август аеннан психолог Татьяна Савельева табибларны һәм шәфкать туташларын стресска ничек бирешмәс­кә, кемгәдер ачу килгәндә дә үзеңнең хис-тойгыла­рың бе­лән ничек идарә итәргә, аны тышка чыгармаска өйрәтә, мастер-класс­лар үткәрә.

 
Театр элгечтән үк башлана дигәндәй, психологик тренингларга шәфкать туташлары, табиблардан тыш, кабул итү бүлекләрендә эшләүче  хезмәткәрләр дә җәлеп ител­гән. Авыру бе­лән белгечләр арасында каршылык менә шул вакытта ук булгалый. Урамнан кер­гән хастага дөрес юнә­леш бирү алардан тора. Пациент кайчакта табиб кабинетын таба алмыйча, бер почмактан икенче поч­макка йөреп арый. Бел­гечнең кайда кабул итүен алдан ук кисәтеп куйсалар, мондый хәл килеп чыкмас иде. Бер караганда, ул кеч­кенә генә нәрсә, ләкин кәеф төшере­р­гә шул да ярап куя. Шулай ук бер үк сорауга җавапны да төрлечә кайтарырга мөмкиннәр. Медицина тармагында эшләүчеләр го­мер-гомергә кешене дару белән генә түгел, сүз белән дә дәвалады. Алардан шулай ук төгәллек тә сорала. Вакытында кабул итүләре, ярдәм күрсәтүләре дә ки­рәк. Тар белгечлекләрдә эшләүче­ләргә эләгүне айлар буе көтәргә туры килә.  “Түбән Камада психологик дәресләрдә, тренингларда барлык хез­мәткәрләрнең 70 проценты диярлек катнашты. Анда алган белемне эшчәнлек­лә­рендә кулланырлар дип уйлыйм”, – ди Казаннан килгән белгеч.


Өйрәтү, укыту – бер нәрсә, гаиләдән килә торган тәрбия дә бар бит әле.      Этика нормаларын әледән-әле онытып җибәрүчеләр дә була. Узган ел, мәсәлән,  бәхәсле вәзгыятьләрдә үзен кулда тота алмаган, пациентлар бе­лән низагка кергән, тавыш күтәргән берничә табибны видеога төшереп, социаль челтәр­ләргә элделәр. Кайберсе шуннан соң эшеннән колак какты. Баш табиблар  бу бәхәсле хәлләрдән шулай котылды. Ләкин мондый күңелсез очраклар дәвалау оешмасында эшләүче­ләр­нең һәр­кайсына тап тө­шерә. Чөнки халык, әнә фәлән поликлиника белгеч­ләре шундый икән, дип сөйләячәк.


“Элек, ник ремонт юк, барысы да иске, дип зарланалар иде. Соңгы елларда поликлиника бинасы бик яхшы итеп төзекләнде­рел­де, ләкин барыбер дизайнны тән­кыйть­ләп китүчеләр табыла, – ди Казандагы 18 нче поликлиника баш табибы Резедә Мансурова. – Кеше бик та­ләпчән хәзер. Ялгыш ычкындырган бер сүзгә әллә нинди мәгънә салырга мөмкиннәр. Психологик әзерлек бездә дә гел булып тора. Гозер белән килгән кешене үзегезнең әниегез яки бүтән якын кешегез дип уйлагыз, аңа ничек җавап бирер идегез икән? Авырулар сездән шундый ук мөгамәлә көтә, дип аң­латабыз. Усаллыкка усаллык белән җавап кайтарырга ярамавын һәрчак исләренә тө­шереп торабыз. Тәҗрибәсез яшьләр бе­лән бер төрле сөй­ләшсәк, олырак буынга икенче төр­лерәк киңәш бирелә. Заманага карап, һәркай­сы­бызга  үзгәрергә кирәк”.

(“Ватаным Татарстан”,   /№ 4, 15.01.2019/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Видеохәбәр