ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 7, 19.01.2019/

//

Ошатып киткәннәр

 

Кышкы каникулда Татарстан башкаласында 150 мең турист кунак булган. Аларның һәркайсы Казанда тәүлегенә 8 – 10 мең сум акча туздырган. Шәһәр мэриясендә уз­ган “эшлекле дүшәмбе”дә кышкы каникулга йомгак ясадылар.

44

Туризмны үстерү комитеты җитәкчесе Дарья Санникова сүзләренә караганда, 30 декабрьдән 8 гыйнварга кадәр Казан кунакханәләре һәм хостеллары уртача 78 процентка тулган. Кунаклар барыннан да бигрәк, 3–5 гыйнварда күбрәк теркәлгән. Бу көн­нәрдә шәһәр кунакханәләре 96 процентка тулган булган. Кышкы каникулда Казанда 150 мең турист рә­хәтләнеп ял иткән. Узган ел белән чагыштырганда, бәй­рәм арасында Татарстан башкаласына килүчеләр саны 13 процентка күбрәк. Туристлар бигрәк тә Казан Кремлен һәм башкаладагы “Ривьера” күңел ачу комплексын үз иткән, ди.

 
Бу юлы Яңа елда шә­һәр­не бизәүгә дә акча кызганмадылар. Моны кунаклар да сизгән. Алар Бауман урамы, Болак күперләре һәм Кремль яр буендагы матурлыкка сокланып, социаль челтәрләрдә бик күп рәхмәт сүзләре язып калдырган. Туристлар арасында Мәскәү, Санкт-Петербург, Түбән Нов­город, Самара, Ижау, Владивосток кебек шәһәр­ләрдән килүчеләр шактый. Чит ил кунаклары да бар. Кышкы каникулда Казанда Казахстан, Төрекмәнстан, Монголия, Франция һәм АКШ туристлары ял иткән.

 
Шәһәр урамнарын тәр­типтә тоту өчен дә тырышканнар. Ел башыннан бирле Казан урамнарыннан 113 мең тонна кар түккәннәр. Кыш башланганнан бирле 265 мең тонна кар чыгарылган. Юлларны чистарту эшен­дә көн саен уртача 600ләп техника һәм шул ук кадәр эшче катнашкан. Ишегалларын тәртиптә тотуны 2 мең 700дән артык урам себерүче тәэмин иткән. Кышкы каникулда Казанда яшәү­челәр 15 процентка күбрәк чүп чыгарган. Яңа ел бәй­рәмендә коммуналь хез­мәткәрләргә көчәйтелгән режимда эшләргә туры килгән хәтта. Моңа кадәр билгеле булганча, узган елның ап­рель–декабрь айларында туристлар Россиядә төрле товарлар сатып алуга 8 миллиард сум акча тоткан.

(“Ватаным Татарстан”,   /№ 4, 15.01.2019/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Видеохәбәр