ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 61, 28.04.2017/

Бездә каз мае юк


Бик суык көннәрдә иртәнге сәгать 6 тулганчы ук “ватсап” төркемендәге әти-әниләр фикер алыша башлый: “Нишлибез, балаларны мәктәпкә җибәрәбезме?” Балалар үзләре дә салкында укырга барырга атлыгып тормый. Кайбер укучыларның кышкы каникулы әле дә дәвам итә. Дөрес, аны бездә беркем дә озынайтмады.

1-1
Хәзер һәркемнең кесә телефонында шундый хәл. Ки­ңәшләшмичә генә мәк­тәпкә җибәрү юк. Кайбер әти-әниләр алдан ук, без укырга җибәрмибез, дип кырт кисә. Шул ук вакытта, балалар ялкаулыкка өй­рәнмәсен әле, мәктәптә ачуланырлар, дию­челәр дә бар. Балалар да урамда борын өшетүгә караганда җы­лы өйдә утыруны кулайрак күрә. Синоптиклар салкын температура вәгъдә иткән­не яхшы беләләр. Социаль челтәрдә сыйныфташлары белән бергәләп, бармыйбыз, бир бишне, дип кичтән үк сүз куешалар икән.


– Диләрә дә, Камил дә бүген мәктәпкә бармады. Эштәгеләрнең барысы да балаларын өйдә калдырган. Узган ел салкыннарда сыйныфта берничә генә укучы килгән иде. Терекө­меш баганасы да температураны төр­лечә күрсәтә. Күп кешеләр­нең машиналары кабынмаган. Балалар­ның мәктәпкә барасы гына түгел, кайтасы да бар бит, – ди Казанда яшәүче Эльяра Зәйнуллина.
Безнең сыйныфтан бүген 30лап баланың бишесе генә килгән. Күп мәктәпләрдә укучылар суыктан курыккан. Кичә хезмәттәшем Рә­шит Минһаҗның да ике баласы ял итте. “Балалар: “Әти, сез салкында мәктәпкә ничек бара идегез ул?”– дип сорый. Кул, битләргә каз мае сөртә идек. Каз мае булмагач, сез мәктәпкә бармыйсыз инде, дидем”, – ди ул.


Кичә шәһәр мәк­тәплә­рендә укучыларның күбесе бер уку көнен “тозлады”. “Салкында бармыйбыз!“ Җа­вап шул иде. Тик мәктәп директорлары гына укучы­лар­ның уку калдыруына сөен­мәде. Фәлән мәктәптә аңлат­ма язарга кушалар, дигән хә­бәрләр дә килеп иреште. Чөнки кичә Казанда көндез 23-25 градус салкын иде. Ә менә авыл мәктәпләрендә хәлләр ни­чегрәк икән?
– Мәктәбебездә 15 бала укый. Каникулдан соң барысы да укырга теләп килде. Безнең балалар салкын булса да, дәрес калдырмаска тырыша. Алар җылы итеп киенә. Автобус та юлга чыкты. Ике авылдан да балаларны ташыды. Җыелыш­ларда әти-әни­ләргә нинди температурада мәктәпкә килергә ярамаганлыгын аң­латабыз. Килмәгән очракта ачуланмыйбыз, – ди Балык Бис­тәсенең Шеморбаш мәк­тәбе директоры Свет­лана Прокопьева.


Заманасында Таулар авылы укучыларының Шеморбаш мәктәбенә җәяү йөргән чаклары да булды. Дөрес­рәге, кыр аша салынган “кәҗә сукмагы”ннан. Хәзер бу тарихта гына калды инде.


Әтнә районындагы Олы Мәңгәр мәктәбенең башлангыч сыйныф укытучысы Зөлфия Муллагалиева әй­түенчә, кичә 1-4 сыйныфта белем алучы 25 баланың 7се генә килгән. “Минем сыйныфтан бер укучы да кил­мәде. Көнем сыйныф бүл­мәсен җыештырып, документларны тәртипкә китереп үтте. Бездә иртән те­рекөмеш баганасы 32 градусны күрсәтә иде. Әти-әниләр, балаларны җибәр­мибез, дип шалтыраттылар. Суык булгач, без каршы килә алмыйбыз. Күрше авылларга автобус чыкмады. 90нан артык укучының 20гә якыны гына мәктәпкә килде”, – диде ул.


Татарстан Мәгариф һәм фән министрлыгыннан алын­ган мәгълүматларга караганда, һәр мәктәп уку мәсьәләсен үзе хәл итә. Шулай да кагыйдә дигән нәрсә дә бар. Шәһәр мәктәп­ләрендә һава температурасы 25 градустан (авылда – 23) түбән төшкәндә башлангыч сыйныф укучылары өчен дәресләр уздырылмас­ка мөмкин. 5-9 сыйныф укучыларына шәһәрдә – 27, авылда 25 градустан да тү­бәнрәк булганда уку калдырырга рөхсәт ителә. Ә өлкән сыйныфлар өчен шәһәрдә – 32, авылда 30 градустан тү­бән булганда гына мәктәпкә бармаска ярый. Югарыда күрсәтелгән һава торышында мәктәпкә бармау дәрес калдыру булып саналмый. Ә педагогларга, боз яуса да, барырга туры килә. Дәрес­ләрнең үткәрелмәвен сыйныф җитәкчесенә яки мәк­тәптә кизү торучыларга шалтыратып белешергә мөмкин.


Бу кагыйдәләрне әти-әни­­ләрнең барысы да бе­ләдер, мөгаен. Тик ш­ә­һәрнең бер почмагында терекөмеш баганасы – бер, ә икенчесен­дә икенче санны күрсәтә. Ул гына да түгел, телевизор, ке­сә телефоны, тәрәз артына элеп куйган термометрдагы температура бөтенләй чагышмый. Менә шул чакта ниш­ләргә?


– Әгәр сезнең өегездә термометр юк икән, төгәл температураны Респуб­ли­каның әйләнә-тирә гидрометеорология һәм кү­зәтү сайтына (tatarmeteo.ru) кереп, “Метеомә­гълүмат­лар­ның интерактив картасы” бүлеген­нән карарга мөмкин. Анда мәгълүмат һәр өч сәгать саен яңар­тылып тора. Шулай ук rp5.ru порталы да сорауга ачыклык кертергә ярдәм итә­чәк, – дип белдерә КФУның метеообсерваториясе бел­геч­ләре.

(“Ватаным Татарстан”,   /№ 3, 10.01.2017/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Видеохәбәр