ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 40, 20.03.2019/

"Мониторның бер ягында мошенник булса, икенчесендә – аның корбаны"


Республикабызның Социаль иминиятләштерү фондында дәүләт акчалары белән “уйнаулары” турындагы хәбәрләрне соңгы арада еш ишетергә туры килә.  Имеш, куллары чиста булмаган белгечләр, булачак әниләрнең ялган керемнәрен күрсәтү юлы белән, фондның йөзләрчә миллион сумнарын үз кесәләренә күчергән.  ТР Эчке эшләр министрлыгының икътисади иминлек һәм ришвәтчелеккә каршы көрәш идарәсе башлыгы Илдар Сафиуллинның журналистлар белән уздырган матбугат конференциясендә иң күп сорау шушы темага булды.

222
https://16.мвд.рф/

 

“Чыннан да, әлегә алты җи­наять эше кузгатылган. Зыян 365 миллион сум күләмендә бил­ге­ләнә”, – диде ул. Җиде ке­ше­гә карата кузгатылган җинаять эше судка тапшырылган инде. Алар арасында иминият­ләштерү фон­дының бүлекчә җитәкчеләре дә, хирург-маммологлар да бар.


Финанс пирамидалары, комарлы уеннар һәм халык акчасын мошенниклык юлы белән тартып алу мәсьәләсе дә бик кискен тора. Быелның ике аенда гына да рөх­сәт ителмәгән уен бизнесы­ның 6 очрагы ачыкланган. “Әлеге төр җи­наять­не ачыклау һәм җәза бирү көннән-көн кыенлаша бара. Чөнки җинаятьчеләр эшчәнлекне интернет аша алып бара. Элек алар ниндидер бинада булса яи­сә акча бе­лән эш иткәндә күренсә, хәзер барысы да электрон рә­вештә башкарыла. Мониторның бер ягында мошенник булса, икенчесендә – аның корбаны. Акча да онлайн кушымталар аша гына күчерелә. Бернинди кисәтүләр дә туктатмый халыкны. Эшләми генә акча отарга омтылу кызыктыра, әмма алай җиңел генә була алмый шул. Кеше, ялган тауларга кызыгып, соңгы­сыннан да мәхрүм кала”, – ди Илдар Сафиуллин.


Яңа төзелә торган йорттан, өлешчә түләп, фатир сатып алу­чыларның башка елларга караганда дәгъвалары кимесә дә, барыбер  ишетелеп тора. Узган ел “Яшьлек” микрорайонында йорт төзүче оеш­маның 63 яшьлек җитәкчесен булачак фатир хуҗалары акчасын үзләштерүдә гаепләп кулга алганнар иде инде. Хәзер исә яңа фактлар ачыкланган. Төзелә торган фатирларның хуҗалары, ипотекага акча күчерү юлы белән, оешма җитәкчесенә 200 миллион сумнан артык акча тапшырганнар. Әмма бу сумманың 115 миллион сумы төрле затлар аша билгеле булмаган максатларга таратылганы билгеле булды. Бүген акчаның кайда икәнлеге ачыклана. Әлеге йортны төзүдә бюджет акчалары кулланылмаса да, хуҗаларның ипотекага батып, бу көнгәчә үз фатирларында яши алмаулары борчу тудыра.


25 яшьлек Гыйрак кешесенең үз ватандашларына Казан университетына имтиханнарсыз укыр­га керергә ярдәм иткәндә тоткарланганы турында интернет шаулап алды инде. Илдар Сафиуллин әлеге вәзгыятькә ачыклык кертте. Әхмәт Шиблави исемле егет үз хезмәте өчен 500дән алып 3000 долларга кадәр акча сораган. Бүгенге көндә университет хез­мәткәрләре арасында бу арадашчыга кемнең яр­дәм кулы сузганы ачыклана.


Казанның Идел буе районында ялган исерткеч эчемлекләр җи­тештерү цехы  юк ителгән. Оператив хезмәткәрләр  57 яшьлек “эш­мәкәр”нең 1 млн 200 мең сумлык спирт­лы сыекчасын тартып алганнар. Казан кешесе әлеге җи­теш­те­рүне үзенең ишегалдында ачып җи­бәргән булган.


Илдар Сафиуллин билгеләп үт­кәнчә, агымдагы елның ике аенда икътисад иминлегенә бәй­ле 594 җинаять ачыкланган. Шуларның  192се – ришвәтчелек, 151е – дәү­ләт мәнфәгатьләренә каршы җи­наять.

(“Ватаным Татарстан”,   /№ 40, 19.03.2019/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!