ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 88, 22.06.2019/

Пешекче – артист ул

 

Марафонның да төрлесе була. Бу юлы аш-су осталары марафоны турында сүз. Ундүртеннән егерме дүртенче февральгә кадәр – ун көн буе барды ул. Онытылып бетә язган борынгы яки үзенчәлекле татар аш-сулары рецептлары буенча тәмледән-тәмле ризык­лар әзерләгәннән соң “финиш”ка беренче булып килүче булдыклы ханымнар, ниһаять, кухняны һәм виртуаль киңлекне ташлап, чынбарлык тормышта берсен-берсе күрү бәхетенә иреште. Алъяпкычларын салып, матур күлмәкләрен киеп куйгач, рес­торанга бәйрәмгә җыелды алар!

 ss1
Республикабызда яшәүче­ләр­гә генә түгел, гомумән, бөтен дөньяда сибелеп яшәүче татар­ларның да күбесенә яхшы таныш аш-су остасы, “Татар мәдәнияте һәм ашлары халыкара ассоциациясе” җитәк­чесе Резедә Хөсәе­нова оештырган бу чараны Юныс Әхмәтҗановны искә алу кичәсе дип тә атарга була әле. Казан рес­тораннары челтәре хуҗабикәсе Резедә ханым марафонны да нәкъ менә татарның аш-суын дөньяга таныткан шушы олы шәхеснең туган көненә багышлап оештырган. Беренче генә түгел, инде өченче тапкыр оештыруы икән. Быелгысы “Тәмле булсын, Резедә!” дип аталган. “Тәмле” марафонда Казанда, шулай ук Арча, ­Әтнә, Балык Бистәсе, Буа, Кукмара һәм башка районнарда яшәүче ханымнар бик теләп катнашкан. Алар көн саен милли ризыклар пешереп, тәм-томнары фотосу­рәтләрен инстаграмдагы сәхи­фәгә урнаштырып барган. Кай­берләре инде моңа кадәр дә әнә шундый аш-суга маһирлык ярышында катнашырга өлгергән булган. Ханымнар өчпоч­мак, бәрәңге пәрәмәче, өлеш, гөбәдия, җи­мешле пылау, эремчекле кабартма кебек ри­зык­ларның рецептларын төр­ләндереп кенә калмаган, бәлки әле үзенчәлекле сөтле аш, авыл кесәле һәм хәтта... чүпрә дә әзер­ләп куйган.


Резедә Хөсәенованың татар кызларына кухняда нәрсәгә сә­ләтле булуларын күрсәтү мөм­кинлеге биреп, әнә шулай барлавы күңелдә бу ханымга карата искиткеч соклану һәм хәтта ак көнләшү хисләре дә уята. Бер карасаң, гади халык кына түгел, эшмәкәрләр өчен дә бик катлаулы заманда үзенең рестораннарында да эш-мәшәкатьләре җитәр­лектер Резе­д­ә Кыям кызының. Әмма, юк, эш арасында әле үзе кебек уңган-булган ханымнарны да ничектер танытасы, күңелләрен күрәсе килә аның. “Артистлар, язучылар кебек иҗат ия­лә­рен һаман саен телевизордан күр­сәтеп, алар турында сөйләп торалар. Ә аш-су өлкәсендә эшләү­ч­еләрне әллә  ни телгә алган кеше юк. Югыйсә, Юныс Әхмәт­җанов әйтмешли, пешекче дә – артист кебек. Кунакның күңелен күрү өчен аңа сәхнәдәге артисттай тыры­шыр­га туры килә”, – ди Резедә ханым.


Кичә барышында марафонда җиңгән гүзәлкәйләрнең Резедә ханымга үзләренең кумирлары кебек каравы, кем әйтмешли, сукыр күзгә дә күренә иде. Кайберләренең йөз­ләрендә Резедә Кыям кызы кебек рес­торан хуҗабикәсенә әйләнү те­лә­ген дә шәйләп булгандыр әле, мөгаен. Пешергән ризыгыңның кадерен белеп ашаучы бар икән, үзеннән-үзе пешереп кенә торасы килә, дип фикер йөртүче әлеге яшь ханымнарның гаиләгә бик зур кыйм­мәт кебек караулары – бә­хәссез. Шуңа күрә марафон гаи­ләне ныгыту ягыннан да зур роль уйный, дип уйларга җирлек бар. Ир-атның мәхәб­бәте ашказаны аша уза, дип тикмәгә генә әйтмиләр. Бөтен хасиятен туры китереп ашарга пешерә белүче хатыннар­ның табыны гына түгел, гаиләсенең дә күркәм булуына иманым камил.

(“Ватаным Татарстан”,   /№ 35, 08.03.2019/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Фотохәбәр

Видеохәбәр