ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 7, 19.01.2019/

Иң матур сан – 833. Татарстанда бәйрәмнәргә нәтиҗә ясадылар

 

Әй, ял итеп тә карады соң халык! Шәһәрдәгеләр – авылга, саладагылар калага юл тотты. Һәркем үзенә кызык, тамаша эзли. Озын-озак яллардан соң, итәк-җиңнәрне сызганып, эш­кә чыктык. Министрлар Кабинетында узган очрашуда ял көн­нә­ренә нәтиҗә чыгардылар.

2-1  
– Ниндидер яңалык табар өчен теләк кенә кирәк. Сарман районында узган Кыш бабай һәм Кар кызлары парадын гына мисал итеп алыйк. Китапханәче булып эшләүче Гөлназ ханым 350 Кыш бабай һәм Кар кызы җыйган, – дип сөйләде Хөкүмәт йортында узган матбугат очрашуында Татарстанның Премьер-министр урынбасары Ләйлә Фазлыева. –Без, социаль челтәрләрдәге һәр яңалыкны күреп, танышып тордык. Күп кенә бәйрәмнәр хәйрия­челек белән үрелеп барды. Ата-ана назыннан мәхрүм булган балалар, авыр хәлгә калган гаиләләр, ялгыз әби-бабайлар – берсе дә читтә калмады. Игътибар белән беррәттән бүләкләр дә өләштеләр. Теләкләрен тормышка ашырырга тырыштылар. Бу елның иң сөенечле вакыйгасы: республикада ел башыннан 833 бала дөньяга килде. Моннан да матур сан була алмый. Яңа атна безне әнә шулай итеп сөендерде.


Хокук сакчылары да бәйрәм көннәрендә икеләтә тырышып эшләгән. Кичке 11дән соң ялгызы гына йөрүче балаларны да тикшергәннәр, тәрбиягә авыр бирелүче гаиләләр белән эшне көчәйткәннәр. “Бәйрәм көннә­рен­дә көчәйтелгән режимда эшләдек. 2018 елның 31 декаб­реннән 2019 елның 7 гыйнварына кадәр 467 җинаять очрагы теркәлде. Эш атнасы белән чагыштырганда 30 процентка кимрәк бу. Шушы көннәрдә 66 юл һәлакәте теркәлде. Ел башыннан республикада 75 янгын очрагы булды. Өч кешенең гомере өзелде, – диде Татарстан буенча Эчке эшләр министр­лы­гының полиция башлыгы урынбасары Фәрхәт Мөхәммәтҗанов. –  “Чыршы” операциясе дә дәвам итте. Түбән Кама шәһәрендә балалар бакчасы ишегалдыннан җиде чыршы кисеп алган ир-ат тоткарланды. Бөгелмәдә берәү паркта үсеп утырган чыршыга кызыккан. Пиротехника турында күпме генә кисәтсәк тә, әле дә шартлаталар. Зыян күрүчеләр дә бар, 10 кеше җәрәхәт алды. Шу­ларның икесе – балалар”. Табиб­лар да  тик утырмаган. Бәйрәм көннәрендә “ашыгыч ярдәм”гә 27 мең шалтырату булган.


Татарстанның мәдәният министры урынбасары Дамир Натфуллин, быел бәйрәм чаралары узган елга караганда күбрәк булды, ди. “2018 елны каршы алганда, халыктан киләсе елда ниләр күрергә теләүләрен сораштырган идек. Аларның тәкъдимнә­рен искә алып эшләдек. 8-9 ел элек кешеләрне өеннән дә чыгарып булмый иде. Хәзер исә алай түгел. Хәтта, тамашаларга билетлар да җитми. Республика халкы киләсе Яңа ел бәйрәмен ничек үткәрелүен тели, ниләр ошамады, нәрсә җитми – барысын да безгә юллый ала”, – ди ул. Бәй­рәмнәрдә Татарстанның мәдә­ният оешмалары 700 чара уздырган, 262 спектакль күрсәткән. Шуның 76сы татарча булган.


Бәйрәм әле бетмәде. Әйтик, “Казан” гаилә үзәге янындагы мәйданда урнашкан шугалакларга кыш ахырына кадәр кагылмаячаклар. Бер атна эчендә Боз шәһәрчегендә 200 мең кеше ял иткән. Казанга күпме турист килгәне исә бер атнадан соң гына ачыкланачак. “Бездә дә матур. Әмма Казан матуррак.  Авылдан әти-әнине дә кереп алдык. Аларга Кол Шәриф мәчетен күрсәтеп чыктык. Йөрмәгән җир калмады. Иске Татар бистәсенә дә бардык. Кабан күле тирәсендә йөрдек. Әмәт паркына да барып килдек. Матурлыкны әйтеп бетерә торган түгел. Хәтта төнлә дә йоклап китеп булмй. Күз алдында энҗе утлар җемелди”, – ди Түбән Камадан килгән Гөлнара Исрафилова.

(“Ватаным Татарстан”,   /№ 2, 11.01.2019/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Видеохәбәр