ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 179, 11.12.2018/

Үзгәрдек тә куйдык


Үткәрелгән һәр ярыш икътисадны үстерүгә этәргеч ясый. “Яшь профессионаллар” төбәк этабының ачылышында WorldSkills International хәрәкәтенең башкарма директоры Дэвид Хоуи әнә шулай диде. Быел Татарстан чемпионатында һөнәр юнәлешләре саны 23кә арткан. Ярыш киләсе елда дөнья чемпионатын кабул итәчәк “Казан Экспо” күргәзмәләр үзәгендә уза.

 4-7
vk.com

 

Бүген көллиятләрдә белем алучыларның берсен дә “птушник” дип үчекләмиләр. “Ворлдскиллс” хәрәкәте бөтенесен үз­гәрт­те дә куйды. Техникум студентлары хәзер республика, ил генә түгел, дөньякүләм бәйге­ләрдә җиңү яуларга омтыла. Моның өчен инглиз телен дә бик теләп өйрәнәләр. Күбесе үз эшен ачарга җыена. Әнә “Казан Экспо” үзәгендә узучы бәйгедә катнашучылар да шушы хисләр белән яна. Ярышлар республиканың тугыз төбәгендә 140лап юнәлеш буенча үтә.


Чемпионатның ачылышында башта җитәкчеләр яшьләргә уңышлар теләде. Хоуи аларга үзләре сайлаган һөнәр белән горурланырга, тотынган һәр эшне һәрвакыт җиренә җиткереп башкарырга киңәш итте. Татарстан Премьер-министры урынбасары Ләйлә Фазлыева һәрбер­сенең сәләтле, үз һөнәренең алдынгысы булуын әйтте. Аның фикеренчә, мондый чемпионатлар уңышлар белән беррәттән кимчелекләрне дә барларга ярдәм итәчәк. Менә шуннан мәгариф системасында әлеге хәрәкәтне үстерү өчен нәрсәне үзгәртергә кирәк икәнлеге дә күренәчәк.


Бәйгегә старт бирелгәч, чарада катнашучы белгечләр, яшьләр барысын да гадел башкарырга ант итте. Шуннан соң техникумнарда алтын куллар эшкә кереште. “Хәзер бигрәк тә эре чәчәк­ләрдән ясалган гөлләмәләргә ихтыяҗ зур. Мин үзем, композиция төзегәндә, башта чәчәкләр­нең зурларын, аннан уртачасын, кечкенәрәкләрен куеп ясыйм”, – ди Казан халыкара хезмәт күрсә­тү көллиятенең өченче курсында белем алучы Дилилә. Дизайнчы булырга җыенучы студентлардан да зәвык таләп ителә. “Кибет киштәсенә табак-савытларны тезәргә кирәк. Бирем шундый. Биш катнашучының берсе – ир-егет. Студентлар сәнгать училищесында, сәүдә-икътисад көл­лият­ләрендә белем ала”, – диде белгечләрнең берсе.


Яшь белгечләрнең осталыгын күрергә студентлар, мәктәп укучылары да килгән. Оештыручылар әйтүенчә, күргәзмә­ләр­дә 15 меңләп укучы катнашачак. Алар үзләрен дә кайбер юнәлешләр буенча сынап карый ала. Чара 7 декабрьгә кадәр дәвам итәчәк. Җиңүчеләр май аенда илкүләм чемпионатта Татарстан данын яклаячак. Ә алда – киләсе елда башкалада узачак дөнья чемпионаты. Анда 60тан артык илдән 1600 кеше катнашыр дип фаразлана.

(“Ватаным Татарстан”,   /№ 165, 16.11.2018/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Фотохәбәр

Видеохәбәр