ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 179, 11.12.2018/

//

Җитәкчеләр алышынды

 

Ведомстволарда – үзгәреш­ләр. Татарстан Республикасы Президенты Рөстәм Миңнеханов Указы ни­гезендә, Айрат Шәфи­гуллин Татарстан Иминлек Советы Секретаре вазифасыннан азат ителде.

 

Хәзер ул, Россия Моно­полиягә каршы федераль хезмәт (ФАС) боерыгы ниге­зендә, РФ Президентының Идел буе федераль округындагы Вәкаләтле вә­киле белән килештерү чорына, Мо­нополиягә каршы федераль хезмәтнең ТР буенча идарәсе җи­тәкчесе итеп билгеләнде. Кичә аны Россиянең ФАС җитәкчесе урынбасары – статс-секретаре Андрей Цариковский һәм Татарстан Премьер-министры вазифаларын башкаручы Рөстәм Нигъмәтуллин ведомство коллективы белән таныштырды.

 
Р. Нигъмәтуллин, А. Шә­­фи­гул­лин­ны күп еллар буе төрле вазифаларда үзен тәҗрибәле идарәче итеп таныткан шәхес буларак таныштырып, республи­кабыз­ның барлык базарларында “сәла­мәт” көндәш­лекне үстерүгә һәр­вакыт зур игътибар бирелеп киләчәген басым ясап әйтте.

 
Ә инде моңа кадәр ФАС ТР буенча идарәсе җитәкчесе вазифасын биләгән Александр Груничев, Президент Указы нигезендә, Татарстан Республикасы Тарифлар буенча дәүләт комитеты рәисе итеп бил­геләнде. Бу вазифада ул ТР Президенты каршындагы Дәүләт торак фондына җитәкче итеп тәгаен­ләнгән Марат Зариповны алыштырды.

 

Италия сәнәгатьчеләре килде

 

Кичә Татарстан Президенты Рөстәм Миңнеханов Хөкүмәт йор­тында РФ Президентының чит илләр белән төбәкара һәм мәдәни элемтәләр буенча ида­рәсе начальнигы Владимир Чернов белән оч­рашты.

 

Очрашуда яклар, уртак проектларны тормышка ашыру һәм икъ­тисадта, фән, мәгариф, мә­дә­ният­тә хез­мәттәшлекне киңәйтү­не кертеп, РФ субъектлары белән ерак һәм якын чит илләр арасында мөнә­сәбәтләр урнаштыруның мө­һимлеген искәртте.

 
Шуннан соң Президент Рос­сиядә Италия сәнәгатьчеләре ассоциациясе – “Confindustria Rus­sia” делегациясе белән оч­раш­ты. Ассоциация Россия базарында эшләүче 150ләп Италия компаниясен бер­ләштерә. Аның эш­чән­леге иле­бездә Италия бизнесы мәнфә­гатьләрен тормышка ашыруга һәм РФ дәүләт хакимияте органнары, профильле оешмалар, партнерлар белән элем­тәләр урнаштыруга юнәлдерелгән.

 

Танышу Чаллыдан башланды

 

Кичә РФ Президентының Идел буе федераль округындагы Вә­каләтле вәкиле Игорь Комаров Татарстанга эшлекле сәфәр кылды. Вәкаләтле вәкил вазифасында аның Татарстанга әле беренче тапкыр килүен билгеләп үтик. 


Югары дәрәҗәдәге кунакны “Бигеш” аэропортында ТР Президенты Рөстәм Миңнеханов каршы алды. И.Комаров, Татарстан җире­нә аяк басуга, Президент белән “КамАЗ” ГАҖ заводларында булып, двигательләр, кабиналар җитеш­терү, әзер йөк машиналарын җыю белән танышты. Вәка­ләтле вәкил йөк машиналары дви­гательләре өчен механик тапшырулар  тартмаларын җи­теш­терүче “ЦФ Кама” заводын да карады. Ул шулай ук әзер йөк машиналарын  җыючы автомобиль заводы һәм әле төзелеп кенә килгән кабина каркаслары заводында булды.

 
Бүген И.Комаров Казанда “2024 елга кадәр илкүләм максатлар һәм  Россия Федерациясен үс­терүнең стратегик бурычлары турында” РФ Президенты Ука­зының төп ни­гез­ләмәләрен тормышка ашыру буенча  киңәшмә үткәрә. Ул шулай ук “Иннополис” махсус икътисади зонасы эше белән танышырга, “Мать и Дитя” медицина үзәгендә булырга ниятли.

 

“ШАЯН ТВ” күрсәтә башлады

 

“Яңа Гасыр” телерадиоком­п­аниясендә тапшырулары тәүлек әйләнәсенә сузылачак “ШАЯН ТВ” дигән беренче балалар телеканалы эшләтелә башлады.

 

Тантаналы чарада ТР Президенты Рөстәм Миңнеханов катнашты.
“ШАЯН ТВ” өч яшьтән унбиш яшькә кадәрге балаларга исәп­лән­гән. Ул танып-белү, белем бирүгә һәм балаларның акылын үстерүгә ярдәм итәрдәй егермедән артыг­рак программаны, уен тамашаларын, викториналарны үз эченә ала.

 
Р. Миңнеханов, яңа телека­нал­ның төп максаты – татар те­лендә аралашу культурасын үс­терү, дип басым ясап әйтте. “Уеннар, төрле кызыклы материаллар телне өй­рәнүгә ярдәм итәчәк. Ата-аналар да әлеге проектны уңай бәяләр дип уйлыйм”, – дип бил­геләп үтте ул. 

(“Ватаным Татарстан”,   /№ 164, 14.11.2018/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Фотохәбәр

Видеохәбәр