ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 40, 20.03.2019/

Кемгә ышанырга?


Журналистлар белән очрашу бүлмәсенә барганда, КПРФ депутаты Хафиз Миргалимов очрады. “Кая таба барабыз? Иртәгә безне ни көтә?” – дип, миңа сораулы караш ташлады. Мин: “Иң әһәмиятлесе, без исән бит әле”, – дип куйдым.

2-8
Дәүсоветта КПРФ депутатлары белән очрашуда алда булачак сайлаулар һәм халык мөрәҗәгатьләре белән эшләү турында сүз барачагын белә идек инде. Шуңа күрә Хафиз Гаяз улына: “Халык ничек уйлый бит?” – дип тә өстәдем.
Депутатларның һәм ха­лык­ның нәрсә турында, ни рәвешле фикер йөртүе очрашу вакытында ачыкланды кебек.


Х.Миргалимов халык мө­рәҗәгатьләренең, нигездә, социаль мәсьәләләргә кагылуын әйтте. Адәм баласын пенсия реформасы бик борчый икән. Депутат әйтүенчә, ил җитәкчелеге бу мәсьәләгә яңадан әйләнеп кайтырга тиеш булачак. Ни өчен? Чөнки, мәсәлән, ирләрнең – 40, ха­тын-кызларның 18 проценты чамасы пенсия яшенә җит­кәнче якты дөньядан китәчәк икән. Кызык өчен мин, интернетка кереп, кайбер мәгълү­матларны караштырдым. Төр­ле сайтларда төрле саннар китерелгән. Мәсәлән, бер­сендә 65 яшькәчә ирләр үлеме буенча Россиянең Европада “мактаулы” беренче урында икәне язылган.


Интернеттагы мәгълү­мат­ларга бик ышанасы да килми, әмма, мәсәлән, хөкүмәт рәисе Д.Медведевның: “Ну... 30 миллион кеше яңача пенсия яшенә (65 яшькә) җитә алмасын да ди. Алар бит – реформага кереп китә (“не вписались”) алмаганнар”, – кебек сүзләрен укыгач, барыбер шикләндерә. Әле А.Чубайс­ның хөкүмәт рәисе сүзләрен куәтләп әйткәннәре дә язылган. Господин Чубайс: “Бу кешеләр өчен дулкынланмагыз. Ну... 30 миллион кеше үләр, алар бит базарга кереп китә алмаганнар. Бу хакта уйламагыз, яңалары туар”, – дигән имеш.


Уйлыйсы килми дә, әмма интернетта тагын бер санны күргәч, барыбер сискәнеп куйдым. “Базарга кереп китә алмаганнарның, ягъни, 35 яшькәчә халыкның яртысыннан артыгы эш таба алмый икән. Х.Миргалимовның: “Әгәр мин президент булсам, Медведевны премьер итеп бер көн дә тотмас идем”, – диюе дә күңелне тынычландырмады.


Рәсми статистикага күз салсаң, илдә уртача гомер озынлыгы – 72,7 яшь, димәк, яңача пенсия яше җиткәч тә гомер бетми икән бит әле. Берничә ел бәхетле картлык кичереп була икән.


Әмма, коммунист де­пу­тат­ларның сөйләгән­нәрен ис­кә төшергән саен, кәеф тә тө­шә башлый. Алар инва­лид­лар­ның торакка чиратка баса алмый интегүләре, аз пен­сиягә яшәүчеләрнең даруларга да акча җиткерә алмаулары, җәмәгать транспортына бәяләр арту турында да җитәкчелекне кушып сөй­ләделәр.
Дөрес, Х.Миргалимов Татарстан җитәкчелегенә, аерым алганда, Президентыбызга тел-теш тидермәде. Ни дисәң дә, бездә хәлләр яхшырак, диде.   

 
Коммунист депутатларга узган ел халыктан 752 хат-мөрәҗәгать кергән, шуның 64 проценты уңай хәл ителгән. Хафиз Гаяз улы әйтүенчә, бу – яхшы күрсәткеч. “Һәр министрлык, ведомство үз эшен җиренә җиткереп башкарса, үтенеч-шикаятьләр бу хәтле үк булмас иде”, – ди ул. Шунысы сәеррәк: узган елга йомгак ясаганда без кайчак “... халыктан фәлән мең мөрәҗәгать керде, димәк, халык хаки­мият­кә ышана” дигән сүзләр дә еш  ишетәбез. Мин моны бик аңлап бетермим һәм наданлыгым өчен гафу үтенәм.


Ә менә депутат Артем Прокофьев халыкның хакимият алып барган сәясәт бе­лән бик үк килешеп бет­мәвен әйтеп куйды. Янәсе, өстәгеләр астагылар сүзен ишетми йә ишетергә теләми. Белмим, кемгә ышанырга инде. Әл­бәттә, оппозиция шактый ук дәрәҗәдә гел киресен сукаларга тиеш инде ул. Әмма, КПРФ фракциясе “шактый ук дәрәҗәдә” дәлилләп тән­кыйть­ли шул. 

(“Ватаным Татарстан”,   /№ 16, 05.02.2019/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!