ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 150, 17.10.2018/

Хуҗасыз әйбер булмый


Республикада 130-150 мең гектар урманның хуҗасы юк. Сәбәбе – алар урман фондына карамый икән. Татарстан урман хуҗалыгы министры урынбасары Әмир Бәдретдинов әнә шулай ди.

1-2
– Урман полосалары авыл хуҗалыгы җирләрендә уңыш­ны арттырырга ярдәм итә, туфрактагы дымны, шулай ук автомобиль юлларын җимерелүдән саклый. Беренче тапкыр бу тәҗрибәне Советлар Союзы Хөкүмәте сугыштан соң, 1948 елда, корылыкка каршы көрәш чарасы буларак киң кулланышка кертте, – ди Татарстан Дәү­ләт Советының Экология, табигатьтән файдалану, аг­рар сәнәгать һәм азык-төлек сәясәте рәисе Таһир Һадиев.


Юл буйларындагы агачлыклар ни хәлдә соң? “Без­нең районда юл кырыйларында үскән урман поло­саларының рәсми рәвештә хуҗалары юк. Аны кем җы­ештырырга, картайган агачлар урынына яңа­сын кем утыртырга тиешлеге билгесез. Мәсәлән, район бюджетында бу эшләргә акча каралмаган. Акча юк дип тормыйбыз, юл кырыйларын чистартабыз, өмәләр ясыйбыз. Юл кырыйларында үс­кән урман агачларга инвентаризация үткәрергә, аларны кадастр исәбенә куярга, чистартып карап тоту­ның нормативларын булдырырга ки­рәк”, – ди Азнакай районы башкарма комитеты җи­тәк­чесе Айдар Шәмсет­динов. Экологлар да яз көне икеайлык санитар чистарту вакытында юл буйларын чүп-чардан арындыра. Та­тар­станның экология һәм табигый ресурслар министры урынбасары Фаяз Шакиров, юл буйларын район хаки­миятләре чистартып тора, ди. “Аларга моны эш­ләү мәҗ­бүри дә түгел югый­сә. Хуҗа­сызлык аркасында шулай килеп чыга”, – ди ул.


– Юл буйларындагы агачларны исәпкә алганчы, яхшылап өйрәнергә кирәк. Кайбер җирләрдә агачлар арасына куаклар үсеп утыра. Алар басу-кырларга өермә җил чыгара. Һәр агачның нинди хәлдә икәнен, кайда нинди агач утыртасын да ачыклау мөһим, – ди авыл хуҗалыгы фәннәре докторы Харис Мусин.


Утырышта әлеге проблема янәшәсендә халык өчен файдалы яңалык турында да җиткерделәр. Быел Россия Урман кодексының 32 нче мад­дәсенә үзгәреш кертел­гән. Ул халыкка урманнардан коры-сары, чыбык-ча­бык­ларны үз ихтыяҗлары өчен бушлай, бернинди рөхсәтсез җыеп алырга мөмкинлек бирә. Россия Урман кодексы буенча, кешеләр агач төп­ләре, агач кайрысы, куаклар, мүк, камышлар, кыргый җи­ләк-җимешләр, “Кызыл ки­тап”ка кермәгән гөмбә­ләрне бушлай җыя ала.


 – Урманнарда чыбык-чабыкны рөхсәтсез бушлай җыеп алу мәсьәләсен халык күтәреп чыкты. Корыган агачларны ягулык буларак файдаланырга мөмкин. Чис­тарту урманның санитар хәлен яхшырту өчен дә мөһим, – ди Таһир Һадиев.


– Корыган ботакларны бушлай җыю дигәндә, эш­мәкәрлек максатында түгел, ә кешеләрнең шәхси ихты­яҗ­лары турында сүз бара. Эшмәкәрләр өчен урманга керер өчен рөхсәт һәм түләү кирәк булачак. Урманчыларга яңа законның үтә­лешен тәэмин итү белән беррәттән, закон бозу оч­рак­ларын кисәтергә, урманнарда контрольне көчәй­тергә дә туры киләчәк, – ди Әмир Бәд­рет­динов.

(“Ватаным Татарстан”,   /№ 133, 18.09.2018/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Фотохәбәр

Видеохәбәр