ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 90, 24.06.2017/

Җавапны бергәләп эзлиләр


Акчаларын “Татфондбанк”та саклаган эшмәкәрләргә тагын бер җылы сүз бар. Исәп-хисап счетында “катып” калган салым түләүләре мәсьәләсе якын арада ук хәл ителергә тиеш. Бу хакта “Татар-Информ” агентлыгында узган матбугат очрашуында әйттеләр. Федераль салым хез­мәтенең Татарстан буенча идарәсе җитәкчесе урынбасары Андрей Никиташин сүзләренә караганда, комиссия вәкилләре эшмә­кәр­ләрдән салым түләү­лә­ренә бәйле 300гә якын мөрәҗәгать кабул иткән.

2-3

Сүз 20 миллион сумнан артык акча турында бара. Әлеге мәсьәләгә ачыклык та керткәннәр иде: мондый түләүләр бюджетка барып җиткән булып саналмый, аларны “катырылган” дип бәяләделәр. Эшмә­кәрләр­дән исә әлеге суммага бурыч исәпләнмәде. Соңгы мәгълүматларга караганда, кредит оешмасына вакытлыча билгеләнгән администрация кичә салым хез­мәтенә эшмәкәрләрнең салымнарын күчерүләре турындагы мәгълүматны җи­бәрә башлаган.

 
“Татарстан Сәнәгать һәм сәүдә палатасы мәйданында яңа оешкан консультатив төркем дә ярдәм иәргә әзер, – диде Татарстан икътисад министры Артем Здунов. – Клиентларга юристлар булышачак. Әлеге эштә барлык министрлык бел­гечләре дә катнашачак”. Сорауларны гамәлдәге “кайнар линия” аша да кабул итәләр. Моның өчен 524-90-90 телефон номерына шалтыратырга кирәк.


Бер авыз пешкәч, салкын чәйне дә өреп кабасың шул. Татарстан Президенты каршындагы эшмәкәрлек буенча советта да махсус проект төркеме төзергә җыеналар. Ул респуб­лика­ның банк өлкәсендә көтел­мәгән хәлләр килеп чыгуын алдан ук кичектерү белән шөгыльләнәчәк. Бу хакта бизнес-омбудсмен Тимур Ногуманов Чаллыда “Татфондбанк” һәм “Интехбанк” клиентлары белән очрашу барышында әйткән, дип хәбәр итә Татарстан эшмә­кәрлек буенча советның мат­бугат хезмәте.


Тимур Ногуманов сүз­ләренә караганда, эш­мә­кәрләр белән бер ай эшләү дәверендә юридик хезмәт вәкилләре вакытлыча бил­геләнгән администрация, салым хезмәте, Россия Пенсия фондына бәйле булган бер меңнән артык сорауны тикшергән. “Хакимият органнары һәр очракта да кризис шартларында эш­ләргә әзер түгел. Соңгы бер айда без әнә шуны аңладык. Еш кына эшмәкәрләргә яр­дәм дә итә алмыйлар, чөнки гамәлдәге закон, регламентта мондый гадәттән тыш хәлләрдә эшләү тәр­тибе каралмаган”, – дигән бизнес-омбудсмен. Моннан ары “Татфондбанк” һәм “Ин­техбанк”ка охшаш хәл­ләр кабатланмасын өчен, хәлдән килгәннең барын да эшләр­гә кирәк, дип тә өстәгән. Проект төркемендә хисап счеты “катырылган” эшмә­кәрләргә салым тү­ләүне вакытлыча кичектереп тору яки өлеш­ләп түләү мөмкин­леген би­рү, юридик зат­ларның акчасын ими­ният­­ләштерү кебек тәкъ­дим­нәрне дә тик­ше­рә­чәк­ләр, дип фаразлана.


Матбугат очрашуы барышында Артем Здуновтан: “Татфондбанк” ник бу хәлгә төште?” – дип тә кызыксындылар. Хәер, соңгы арада бу сорау еш яңгырый. Министр фикеренчә, республика банклары тирәсен­дәге вәзгыятькә вакытлыча билгеләнгән администрация генә төгәл бәя бирә алачак. “Төп бурычыбыз – банкларны санацияләү, ягъни сәламәтләндерү юнәле­шендә эшләү, клиент­лар­ның югалтуларын һәм килеп чыгарга мөмкин булган куркынычларны киметүдән гыйбарәт. Эш төркеме ул – тикшерүче орган түгел. Вакытлыча билгеләнгән администрация чыгарган карарны көтәргә кирәк”, – диде Артем Здунов.

(“Ватаным Татарстан”,   /№ 7, 18.01.2017/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Фотохәбәр