ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 83, 19.06.2018/

Ни көтәргә белгән юк


Дөнья чемпионатында Россия данын кемнәр яклыйсы билгеле. Якшәмбе көнне җыелма команданың тренерлар төркеме төп исемлеккә кергән 23 футболчыны игълан итте. Араларында ”Рубин”нан да ике уенчы бар. Чемпионат вакытында Казанда урнашачак командалар исә бу атнада Татарстан башкаласына килә башлый.

1-1


”Дөнья чемпионатында кем өчен җан атарга җые­на­сыз? Төркем уеннары тәмам­ланганчы – Россия өчен, аннары белмим”. Футболга кагылышлы иң еш ишетелгән мә­зәкләрнең берсе әнә шундыйрак. Ә бүген Россия җы­ел­ма командасы Төркия футболчыларына каршы иптәш­ләрчә уен уздыра. Безнеке­ләр өчен дөнья чемпионаты алдыннан соңгы сынау булачак бу. Россия командасы быел шундый ук өммәттәге өч матч уйнады инде һәм барысында да җиңелүгә дучар бул­ды. Дөрес, Бразилия бе­лән Франция дөнья футболында лидерлардан санала. Тик менә Австралия андыйлар сафына керми. Шуңа күрә дөнья чемпионатында хуҗа­лардан ни көтәргә дә белгән юк.


Дүрт елга бер мәртәбә оеш­тырылган чемпионат­ның Россиядә узасы моннан сигез ел элек билгеле булды. Шул арада дистәләгән стадион төзелде, йөзләгән парк ачылды, меңләгән чакрым юл салынды, болар өчен миллиардлаган сум акча тотылды, ә менә башкалар кебек туп тибә белгән бер команда туплый алмадык. Осталыкка әллә ни өмет юк. Анысы булса, Россия җыелма команда­сының һич югы, бер уенчы­сы чит ил клубларында чыгыш ясар иде. Дөрес, бар андый бер егет. Денис Черышев испаннарның ”Вильярреал” командасында уйный. Әмма ул алты яшеннән бирле чит илдә яши. Башкалар исә үзебездә уйный һәм Россия паспортына ия булганнары аркасында миллионнар ала. Әмма дөнья чемпионатында бу гына ярдәм итә алмый. Бар өмет – үҗәтлек, хис һәм тамашачы ярдәмендә. Ышаныч та кирәк. Дөньяның иң танылган уенчыларыннан берсе саналган Бразилия футболчысы Кафу әнә шулай ди. ”Ә нигә әле Россия җыелма командасы җиңү яуламасын. Алар үзләрендә чыгыш ясый. Соңгы матчларда сөендерә алмадылар, әмма дөнья чемпионаты – бөтенләй башка ярыш. Төркемнән чыгу мөм­кинлеге бар. Тик менә тамашачылар гына футболчыларга ышанмый. Ышанырга кирәк”, – дигән ул журналистларга Калининградка килгәч.


Якшәмбе көнне исә Россия җыелма командасы тренерлары дөнья чемпионатында чыгыш ясыйсы уенчылар исемлеген игълан итте. Шунысы бар: әлеге хәбәрне якшәмбе көнне, халык ял иткән арада тараттылар. Бу эшне зурлап башкарырга да мөмкин булыр иде. Ә бит бу егетләр Россия футболы тарихындагы иң зур вакыйгада ил данын яклаячак.


Исемлеккә капкачылар – Игорь Акинфеев (ЦСКА), Владимир Габулов (”Брюгге”, Бельгия) һәм Андрей Лунев (”Зенит”); сакчылар – Владимир Гранат (”Рубин”), Сергей Игнашевич (ЦСКА), Федор Кудряшов (”Рубин”), Илья Кутепов (”Спартак”), Андрей Семенов (”Ахмат”), Игорь Смоль­ников (”Зенит”) һәм Марио Фернандес (ЦСКА); ярымсакчылар – Юрий Газинский (”Краснодар”), Александр Головин (ЦСКА), Алан Дзагоев (ЦСКА), Александр Ерохин (”Зенит”), Юрий Жирков (”Зенит”), Роман Зобнин (”Спартак”), Далер Кузяев (”Зенит”), Антон Миранчук (”Локомотив”), Александр Самедов (”Спартак”) һәм Денис Черышев (”Вильярреал”, Испания); һөҗүмчеләр – Артем Дзюба (”Арсенал”), Алексей Миранчук (”Локомотив”) һәм Федор Смолов (”Краснодар”) кергән.


Футбол буенча дөнья чемпионаты вакытында Казанда урнашачак командалар бу атнада килә башлый. Австралия футболчылары Татарстан башкаласына 10 июнь көнне аяк басачак. Команда ”Ак барс” клубының базасында яшәячәк, күне­гүләрен исә ”Хезмәт резервлары” стадионында уз­дырачак. Австралия командасыннан тыш, Казанда Колумбия һәм Япония футболчылары да урнашачак. Алар Татарстан башкаласына 12 һәм 13 июнь көннәрендә килер, ”Рубин” базасында һәм ”Казан” тау чаңгысы комплексында урнашыр дип көтелә. Россиядә футбол буенча дөнья чемпионаты 14 июньнән 15 июльгә кадәр 11 шәһәрдә узачак. Казан алты матчны кабул итә.

(“Ватаным Татарстан”,   /№ 81, 05.06.2018/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Фотохәбәр

Видеохәбәр